Неосновани и неточни се наводите за незаконски донесено решение од Централен регистар за упис на нов претседател на Сојузот на синдикати на Македонија, соопшти денеска Централниот регистар.
Извршено е, како што појаснуваат, евидентирање на промена на овластено лице за застапување на Сојуз на синдикати на Македонија, а основен регистар за синдикатите е Министерството за труд и социјална политика.
– Централниот регистар на Република Македонија постапува во рамки на своите надлежности предвидени во Законот за Централен регистар и во согласност со член 13 од Законот за едношалтерски систем и за водење на Трговскиот регистар и регистарот на други правни лица. Имено, во регистарот на други правни лица, врз основа на Решение број 08-8191/2 од 14.11.2016 донесено од министер за труд и социјална политика Фросина Ременски и Решение број 08-8191/14 од 04.08.2017 донесено од министер за труд и социјална политика Мила Царовска, се изврши евидентирање на промена на овластено лице за застапување на Сојуз на синдикати на Македонија, се вели во соопштението.
Согласно член 190 став 1 од Законот за работните односи, се додава, синдикатите се запишуваат во регистарот на синдикати кој се води во Министерството надлежно за работите од областа на трудот. Според тоа, посочуваат од Централниот регистар, основен регистар за синдикатите е Министерството за труд и социјална политика. Централниот регистар на Република Македонија согласно член 13 од Законот за едношалтерскиот систем и за водење на трговскиот регистар и регистарот на други правни лица обезбедува податоци определени во член 4 од истиот Закон за субјектите за кои основниот регистар го води друг орган.