Телата на две жени, кои загинале во вчерашните експлозии во магацин за оружје во Абхазија, се пронајдени изутринава во близина на објектот, јави ТАСС, повикувајќи се на абхазиското Министерство за внатрешни работи.
Пронајдени се телата на туристки од Санкт Петербург, кои биле смртно ранети од експлозијата во магацинот, покрај кој минувале враќајќи се од прошетка со коњи од околниот водопад, нагласија министерствата за внатрешни работи и за вонредни ситуации. Уште една жена, која била со нив е пронајдена и таа има скршеници на раката и е сместена во болница.
За трите исчезнати туристки беше соопштено вчера, но потрагата по нив почна, откако престана четиричасовната серија експлозии во магацин во селото Приморское, на брегот на Црното Море.
Според различни податоци во експлозиите се повредени неколку десетици лица, вклучувајќи и над 30 руски туристи. Дваесет и седум лица се сместени во болница.
– Повеќе од 50 лица, од кои 19 Руси, кои биле на одмор во Абхазија се примени во болница со контузии и повреди од шрапнели. Сите повредени се вон животна опаснот, изјави абхазискиот министер за здравство Тамаз Цахнакија.
Абхазија заедно со Јужна Осетија се отцепија од Грузија на почетокот од 90-тите години на минатиот век. Москва ги признава како независи држави по војната со Грузија во август 2008 година.
Во Абхазија и Јужна Осетија распоредени се руски војници, а за Тбилиси тоа е окупација.