Општина Аеродром нема потрошено ниту еден денар од буџетот за рекламирање на својата работа и за рекламирање на проектите, реагира Општината на прес-конференцијата на Златко Марин од СДСМ, кој праша кој ги плаќа скапите реклами на градоначалникот Ивица Коневски.
„Актуелната промотивна кампања на Општина Аеродром е целосно бесплатна и медиумите имаат јасно назначено дека емитувањата се бесплатни. Оттаму може да се види дека безидејноста на држење прес-конференции на опозицијата во општина Аеродром има единствена цел за себепромоција“, се вели во реакцијата.
Општина Аеродром го повика Марин, наместо, како што велат, постојано да ја замајува јавноста со безначајни изјави, да ги повика државните органи кои се под нивна палка веќе неколку месеци да дојдат во Општината и да се уверат во транспарентноста и законитоста на нејзиното работење.