Кадетската кошаркарска репрезентација на Македонија (до 16 години) од денеска до вторник ќе настапи на меѓународен турнир во Истанбул.
Избраниците на селекторот Горан Ѓеорѓиевски ќе одиграат четири пријателски натпревари против селекциите на Грузија (два натпревари), Катар и екипата на Истанбул Баскет.
Денеска и утре македонските кадети ќе играат против врсниците од Грузија, по што во понеделник ќе следува мечот против екипата на Истанбул Баскет која е домаќин на овој турнир, а во вторник настапот ќе биде заокружен со средбата против Катар.
Инаку, овие натпревари се дел од подготовките за настап на претстојното ЕП (Дивизија Б) кое во периодот од 10 до 19 август ќе се одигра во Софија, а на кое во рамки на групата Д, нашите кадети на за противници ќе ги имаат селекциите на: Португалија, Луксембург, Грузија, Велика Британија и со Косово.