Невремето што ја зафати општина Гевгелија на 22 април годинава предизвикало штети на земјоделските посеви во висина од 2,86 милиони денари, констатира во својот извештај Општинската комисија за проценка на штети по извршениот увид на терен.
Ниските температури и мразот најголеми штети предизвикале во атарите на селата Моин, Миравци, Давидово, Богородица и дел од градот Гевгелија каде што според оценката на комисијата на површина од околу 20 хектари мразот предизвикал измрзнување на овошните насади, лозјата и градинарските култури, на одделни површини дури и целосно.
Елаборатот за предизвиканите штети од априлските мразеви беше усвоен од Советот на општината со укажување од потребата за натамошно поттикнување на индивидуалните земјоделски производители за навремено оигурување на посевите. Советот заклучи елаборатот да биде доставен до Републичката комисија за проценка на штети од елементарни непогоди, за натамошно постапување.