Ивона Талевска и натаму нема да може да патува надвор од земјава, откако Апелациониот суд денеска ја одби нејзината жалба за мерките за претпазливост коишто ги одреди Кривичниот суд. Талевска која е обвинета за даночно затајување во случајот „Тифани“, останува без пасошот и со обврска секој понеделник во месецот да се јавува во судот.
Апелациониот суд ја потврди одлуката на Основниот суд Скопје 1, кој што навел дека одлуката за одземање на патната исправа е оправдана, бидејќи Талевска често патувала во странство и оти имало опасност од нејзино бегство.
Одбраната на Талевска образложувајќи ја жалбата пред Апелациониот суд наведе дека одземањето на пасошот на Талевска е тенденциозно, и дека нејзе и е потребен со оглед дека често патува зашто е заменик главен уредник на Сител.
Талевска е обвинета во случајот „Тифани“ дека преку своите две фирми „Смарт центар“ и „Смарт груп“ од 2008 до 2014 година затаила данок во износ од 44,5 илјади евра.