Со 402 гласа „за“ и 120 гласа „против“ во Романија е изгласана нова влада на Виктор Понта.
Владата ќе положи заклетва пред претседателот на државата, кој во повеќе наврати се изјасни против премиерот Понта.
Првата влада на Виктор Понта, од 7 мај, и оваа вторава, која е резултат на парламентарните избори одржани на 9 декември, единствени се влади од 2004 година, во чие формирање не учествуваше претседателот Трајан Басеску.
Понта нагласи дека ова е „крај на политичкиот свет на омразата, раздорот, сиромаштијата, кражбите на јавни пари“ и оти почнува нов начин на владеење, свртен кон сите Романци.
Понта предлага измена на Уставот за јасно да се дефинираат овластувањата на претседателот на државата, владата и парламентот, со цел повеќе „да не зависи се од еден човек“.
Во план е децентрализација на Романија на осум региони со поголеми овластувања, а проблемите на граѓаните да се решаваат локално.
Понта најавува и структурни реформи во областа на енергетиката, земјоделството, државните компании, како и борба против „екстремната сиромаштија“, спроведување на социјална правда и солидарност.
Меѓу приоритетите на новата влада е создавање работни места, големи проекти во областа на инфраструктурата, коректна и ефикасна фискалоност и користење на европските фондови, кои досега ретко се користеа, објави РТС.
Се најавува подобра соработка со ЕУ и НАТО, како и стратешко партнерство со САД.