Акција за уништување на ларви од комарци, односно ларвицидна дезинсекција на местата каде има стоечка вода започна денеска во општина Гевгелија.
Претставници од компанијата „Зотокс“, која спроведува дезинсекција, информираат дека ова е првата мерка за заштита од комарци која предвидува ставање таблети против ларвите од комарци во сите места со стоечка вода лоцирани покрај реката Вардар и дека во претстојниот период на територијата на општината се предвидени и две авионски прскања против комарци.
Покрај ова, денеска почна и дератизацијата за сузбивање и намалување на штетните глодари. Во акцијата ќе се користат специјални препарати против глодари кои ќе бидат поставени во повеќе од 1.800 шахти од фекалната и атмосферската канализација на територијата на општина Гевгелија.