Прва национална конференција за жени во спорт ќе се одржи денеска во Скопје во организација на Здружението за унапредување на меѓусебната доверба – ТАКТ, а поддржана од страна на UN Women, Амбасадата на САД и Факултетот за физичко образование, здравје и спорт.
На конференцијата ќе се дебатира за предизвиците со кои се соочуваат македонските спортистки, за зајакнување на жените преку спортот и за стратегии за постигнување родова еднаквост во спортот и зголемување на бројот на жените на раководни функции во спортските институции.
Специјална гостинка на конференцијата е директорката на Центарот за спорт, мир и општество во САД, Сара Хилер, која ќе се обрати пред присутните.
Најавени се говори и на Силвија Митевска, претседателка на ТАКТ, Лора Браун од американска амбасада во Скопје, Доминика Стојановска, раководителка на канцеларијата на UN Women во Скопје, Ленче Алексовска-Величковска, деканка на Факултетот за физичко образование, спорт и здравје, Моника Гавриловска, генерална секретарка на македонската кошаркарска федерација, Марија Митевска, маратонка и претседателка на невладина организација за социјално претприемништво, Андријана Зафировска Мисовски, професорка на Факултетот за физичко образование, спорт и здравје, Едина Муса, репрезентативка во кошарка и Андријана Будимир, тренер во ракомет.