Јавното претпријатие за јавни паркиралишта „Паркинзи“ на Општина Центар ќе вработи нови 32 лица за надворешните локации, а со оглед на отворањето нови паркинг-зони во Kапиштец, Дебар Маало, Градски парк, Соборен храм и други, извести „Дневник“ во денешниот број.
Огласот е веќе распишан, а предност ќе имаат оние што се привремено вработени преку агенциите за привремени вработувања. Овие луѓе ќе бидат одговорни за контролата на наплата и ќе им помагаат на луѓето со паркирањето. Ќе бидат задолжени и да им даваат потребни информации на граѓаните, бидејќи многумина не се запознаени со системот.
Од претпријатието за весникот изјавуваат дека со ова ќе го избегнат плаќањето од 5 отсто кај агенциите за привремени вработувања, а и додаваат дека за годинава биле предвидени 65 нови вработувања, но оваа бројка е преполовена со востпоставување на систем кој не бара присуство на многу луѓе.
Надлежните во „Паркинзи“ додаваат и дека и покрај тоа што предност ќе имаат оние кои се привремено вработени, сепак ќе има тестирања и интервјуа, а привремено вработените ќе треба и да се јават на огласот.