Надлежен обвинител од Основното јавно обвинителство за гонење организиран криминал и корупција до Основниот суд Скопје 1 Скопје поднел предлог за изрекување мерки за обезбедување на присуство на петтемина осомничени за трговија со дрога. Како што информира ОЈО, предлогот бил поднесен поради постоење законски основи, како и поради избегнување на попречување на водењето на кривичната постапка.
– Надлежен обвинител од Основното јавно обвинителство за гонење на организиран криминал и корупција издал Наредба за спроведување истражна постапка против пет лица за сторени кривични дела „неовластено производство и пуштање во промет наркотични дроги, психотропни супстанции и прекурсори“, поради основано сомневање дека како организирана група неовластено држеле и продавале наркотична дрога – кокаин, пронајдена кај дел од нив при личните претреси и претресите во нивните домови, се наведува во соопштението од ОЈО.
Оттаму посочуваат дека кај двајца од осомничените е пронајден и различен вид на муниција што неовластено ја држеле, поради што против нив се води постапка и за сторено кривично дело „недозволено изработување, држење и тргување со оружје или распрскувачки материи“ од член 396 од Кривичниот законик.
По преземени истражни дејствија во текот на изминатите месеци, за сите осомничени се обезбедени материјални и други докази врз основа на кои се темели основаното сомневање за сторените кривични дела, се вели во соопштението од ОЈО.
