Рускиот министер за надворешни работи Сергеј Лавров изјави дека во, според него, денешниот прагматичен разговор со американскиот државен секретар Рекс Тилерсон не станало збор за економските санкции на САД против Русија.
Лавров првпат се сретна со Тилерсон денеска во Бон на маргините на средбата на шефовите на дипломатии на земјите од Г-20.
– Средбата беше прагматична, во бизнис стил. Разговаравме за заедничките интереси на двете земји, главно за борбата против тероризмот, истакна шефот на руската дипломатија. Тој потврди дека тема биле и конфликтите во Сирија, Украина и Авганистан.
Тилерсон ја потврдил подготвеноста, изразена од претседателот на САД, Доналд Трамп во телефонскиот разговор со рускиот колега Владимир Путин, за надминување на проблемите во односите со Русија.