СДСМ и Зоран Јовановски не се расправаат со Владата, ниту со ВМРО-ДПМНЕ, туку се расправаат со Светска банка која отворено и недвосмислено потенцира дека Македонија е една од најмалку задолжените држави во Европа, истакнува ВМРО-ДПМНЕ во писмената реакција на прес-конференцијата на СДСМ.
– Светски релевантни институции кои ја придвижуваат глобалната економија како Светска банка и ММФ јасно нагласуваат дека Македонија е четврта по ред најмалку задолжена држава во Европа, дека Владата покажа фискална мудрост држејќи го буџетскиот дефицит во изминатите неколку години на строго дефинирано ниво од 2,5 отсто и дека со заемот од СБ ќе се финансираат клучни реформи. И кога врвни светски институции ќе дадат ваква потврда за исправноста на напорите на Владата за избавување од последиците од глобалната економска криза повеќе од очигледен е фактот дека СДСМ цело време манипулира и ја лаже македонската јавност. Денес се разоткри политиканството на СДСМ и Зоран Јовановски, се вели во реакцијата.
ВМРО-ДПМНЕ посочува дека заемот од Светска банка и е доделен на Македонија под најдобри можни услови и оти Македонија е втора земја во Европа која најмалку ја зголемила задолженоста меѓу 2009 и 2012 година.
– Во периодот од 2007 до 2012 година исплативме скоро 400 милиони евра, долгови кои главно беа направени од СДСМ. Во однос на долговите треба да се знае дека повеќе од половина од средствата што идната година ќе бидат исплатени, се долгови направени во времето на Бранко Црвенковски и СДСМ, се наведува во реакцијата.
