Старите лица во Скопје од денеска добиваат Дневен центар за стари лица и Центар за давање помош во домашни услови.
Реализацијата на проектот чини 2 милиони денари, а парите се од буџетот на град Скопје.
„На овој начин ќе се овозможи организиран начин на минување на времето на старите лица, но и нивна меѓусебна социјализација. Исто така, 60 изнемоштени стари лица коишто живеат сами ќе добиваат грижа, односно медицински и социјални услуги во домашни услови: мерење на шеќер во крвта, мерење на притисок, давање совети за исхрана, помош во купување прехранбени продукти, лекови и сл., придружба на старото лице при одење на лекар, на прошетка, како и други активности за социјализација.
– Во Центарот е отворена и телефонска линија на којашто граѓаните ќе можат да се јават и да добијат информации за функционирањето на Дневниот центар и можностите за користење на услугите”, изјави градоначалникот на Скопје, Коце Трајановски .
Министерството за труд и социјална политика одвои 700 илјади денари за адаптација и опремување на дневниот центар.
„Се надевам дека реализацијата на овој проект ќе значи пример и за другите градоначалници како можат да им го разубават животот на своите пензионери и повеќе да се грижат за старите лица во нивните Општини”, изјави министерот за труд и социјална политика, Спиро Ристовски.
Домашна посета за почеток ќе се врши на околу 180 стари лица.