Иранскиот министер за надворешни работи Мохамад Џавад Зариф одбива да потврди дали неговата земја изврши тестирање на балистичка ракета.
Зариф денеска само напомена дека иранската ракетна програма не е дел од спогодбата за ограничување на нуклеарната програма, што Техеран и светските сили ја потпишаа во 2015 година во замена за укинување на санкциите, пренесоа американските медиуми.
-Прашањето за ракетите не е дел од спогодбата за нуклеарната програма, изјави Зариф на денешната заедничка прес конференција со францускиот министер за надворешни работи Жан-Марк Еро, кој се наоѓа во посета на Техеран
Зариф ја повтори традиционалната позиција на Техеран дека неговите ракети „не се конструирани да носат нуклеарни боеви глави“.
Белата куќа вчера соопшти дека ги истражува деталите околу извршеното иранско тестирање на балистичката ракета.
Иран доби резолуција на Советот за безбедност на ОН, со која му се забарануваат тестирања на балистички ракети со капацитет да носат нуклеарни боеви глави.
На денешната прес конференција Еро изјави дека Франција јасно ја изрази својата загриженост во врска со иранското тестирање на балистичка ракета, и додаде дека тоа ја наруши довербата на меѓународната заедница во Иран и ја прекрши Резолуцијата 2231 на Советот за безбедност на ОН, пренесоа британските медиуми.