Словачкиот министер за надворешни и европски работи Мирослав Лајчак изјави дека е неопходно да се продолжи со политиката на отворени врати кон земјите од Западен Балкан и оти Европската унија во следниот период треба да испраќа јасни пораки за кредибилноста на таа политика.
Лајчак синоќа за телевизија Црна Гора истакна дека продолжението на политиката на отворени врати на ЕУ е мошне важно, особено поради земјите, кои се во транзиција, со цел да имаат јасна перспектива за членство.
– Парламентарниот бојкот на црногоската опозиција во оваа фаза на европските интеграции не може да влијае врз тој процес, смета Лајчак.
Тој изрази уверување дека Црна Гора има зрелост и капацитет и сегашната ситуација да ја надмине сама, без помош од страна.
Лајчак очекува продолжение на забрзаното темпо за ратификација на протоколот за пристапување на Црна Гора во НАТО, во согласност со внатрешната парлментарна динамика на земјите-членки на Алијансата.