„Има ли Македонија премиер?“, прашува ЛДП.
„Во државата врие, а Никола Груевски е во бегство. Премиерската фотеља му ја отстапи на коалицискиот партнер. Али Ахмети пак, со задоволство ја искористи ситуацијата и со колегите премиери на Албанија и Косово, Бериша и Тачи, ја промовираа, среде Скопје, идејата за Голема Албанија“, реагира ЛДП на 10 дневното отсуство на премиерот Груевски од државата.
„Со ова, Никола Груевски и дефинитивно покажа дека не може да го брани македонското достоинство, како што се пофали по инцидентот во Слупчане.При посетата на САД, очигледно организирана набрзина за да исчезне од државата , Груевски бесцелно талкаше по американските болници, винарии , супер маркети и маркетинг агенции“, стои во соопштението на ЛДП.
Да биде иронијата поголема, велат, македонскиот премиер се пофали дека обезбедил едукација на 100-тина доктори, додека дома му штрајкуваат околу 1.500 специјалисти и професори со повеќе годишно искуство и илјадници операции зад себе.
„Народот е во дилема, дали нашиот премиер има намера барем „Свети Никола“ да го прослави во Македонија“, прашува ЛДП.