Новоизбраниот американски претседател Доналд Трамп го убедил шефот на египетската држава Абдул Фатах ал Сиси да ја одложи резолуцијата предложена во ОН од владата на Египет за израелските населби на Западниот брег и источен Ерусалим, за која во Советот за безбедност требаше да се гласа во вчера.
Спред американските медиуми, кои се повикуваат на израелски дипломатски извори, владата на Израел стапила во контакт со тимот за транзиција на Трамп, кога дознала дека Администрацијата на актуелниот претседател Барак Обама има намера да се воздржи од гласањето во Советот за безбедност.
Таквиот потег на Вашингтон би овозможил усвојување на резолуцијата на Египет, со која се бараше од Израел да прекине со изградбата на еврејските доселенички населби на териториите освоени по војната од јуни 1967 година, оценувајќи ја таквата постапка како прекршување на меѓународното право.
Трамп телефонски разговарал со Ал Сиси и притоа двајцата се согласиле дека треба „да и се даде шанса на новата администрација на САД да се справи со различните аспекти на палестинското прашање“.
Израелската јавност со воодушевување го пречека ваквиот расплет на осудувачката египетска резолуција, благодарејќи му на Трамп што овозможи „Израел одново да се чувствва голем“.
Администрацијата на Обама од подамна го осудува градењето нови населеби за еврејските доселеници на територијата што Израел ја смета за своја, но меѓународната заедница ја означува како „окупирана“.
Трамп претходно изјави дека мир меѓу Израел и Палестинците треба да се постигне преку директните преговори на двете страни, а не преку услови наметнати од ОН.
Одлуката на Владата во Каиро, не значи и целосно откажување од резолуцијата, затоа што постои можност четири други непостајани членки на Советот за безбедност- Нов Зеланд, Венецуела , Малезија и Сенегал, да ја обноват постапката, затоа што соопштија дека се согласуваат со резолуцијата.
Околу 500 илјади Евреи се населени во 140 населби на Западниот Брег и источен Ерусалим по седумдневната војна во јуни 1967 година, од кога овие две подрачја, заедно со Голанската Висорамнина, се под контрола на Израел.