Во Скопје денеска се одржа конференција на тема „Инспирирај за компјутерска иднина“, која се спроведува во рамки на проектот „Девојки во технологија: Намалување на родовиот јаз во техничките професии“.
На отворањето на конференцијата се обрати градоначалникот на Град Скопје, Коце Трајановски, кој рече дека целта е Скопје да стане родово еднаков град и оти се трудат оваа цел да ја реализираат преку исполнување на обврските превземени со усвојувањето на стратегиите за родова еднаквост на градот.
– Но, со задоволство поддржуваме и проекти како овој во кои учествуваат и младите и имаат за цел да ја зголемат свеста за одредени општествени појави кај сите нас. Информираноста и едукацијата за родовите прашања е особено важна за средношколската популација, од која очекуваме многу појасно и похрабро да ги согледа работите и да биде иницијатор на идните промени, истакна Трајановски.
Беше презентирана и анализата „Средношколците и природните науки: Анализа на ставовите и перцепциите од родов аспект“ од страна на Ана Мицковска – Ралева од Центарот за истражување и креирање политики.
– Она што го знаеме веќе подолго време е дека во професиите постои родова сеграгација, што значи дека постојат „типични машки професии“, најчесто од областа на технологијата и слично, и „типично женски професии“, коишто повеќе се поврзуваат со областите на грижа, образование и слично, посочи Мицковска – Ралева.
Според неа, ваквата поделба предизвикува нееднаквост на пазарот на труд бидејќи професиите коишто се поврзани со техниката и технологијата се подобро платени, додека професиите коишто повеќе ги извршуваат жени се помалку платени. – Со самото ова мажите и жените имаат нееднакви приходи и нееднакво се вреднува нивниот труд, рече Мицковска – Ралева.
Проектот „Девојки во технологија: Намалување на родовиот јаз во техничките професии“ го реализира Центарот за истражување и креирање политики (ЦИКП) со поддршка на Град Скопје.