Зајакнујвање на банкарскиот систем, зголемување на довербата во банката и сигурноста ќе се постигне со предвидените измени и дополнувања на Законот за банки што денеска во прво читање доби поддршка од членовите на собраниската Комисија за финансирање и буџет.
Заменик-министерот за финансии Гзим Беадини образложувајќи го предлогот рече дека причините за донесувањето на измените и дополнувањата на Законот за банките произлегуваат од потребата за подобрување на досегашната законска регулатива која го регулира работењето на банките во Република Македонија, како и прилагодувањето кон барањата кои ги диктира банкарскиот и финансискиот систем во Република Македонија.
Измените и дополнувањата произлегуваат од потребата за натамошно усогласување на домашната банкарска регулатива со Базел 3 и Базелските принципи за корпоративно управување.
Во посткризниот период Базелскиот комитет за банкарска супервизија донесе документи познати како Базел 3 со кои ги зајакна капиталните барања за банкарскиот сектор, а во 2015 година донесе нови принципи за корпоративно управување на банките.
Законот за банките е донесен во мај 2007 година. Со Законот се уредува основањето, работењето, супервизирање и престанокот на работењето на банките и филијалите на странски банки односно воведувањето на стечај и ликвидација во банка, филијала на странска банка во Република Македонија и отворање и работење на филијали на банки од земји членки од Европската Унија.
Заменик-минситерот истакна дека основни решенија што се предлагаат со законот се зајакнување на корпоративното управување, преку примена на новите Базелски принципи, воведување заштитни слоеви на капиталот и тоа: заштитен слој за зачувување на капиталот, противцикличен заштитен слој, заштитен слој за системски-важни банки и заштитен слој за системски ризик, како и зајакнување на корективните мерки што може да ги преземе Народната банка на Република Македонија.
Предложените измени и дополнувања се усогласени со Народната банка на Република Македонија, а банките се информирани за предлог-текстот.