По неколкучасовно ангажирање, изгаснат е пожарот кој синоќа избувна во месноста Моклиште кај Ваташа и кој се прошири кон висорамнината Витачево, Кавадаречко.
Како што информира Петко Ристовски од Подружницата на ЈП „Македонски шуми”, пожарот зафати шеесетина хектари трева, трње и грмушки, но не и објекти и шума.
– Во гаснењето учествуваа дваесетина лица од кои поголемиот дел работници во подружницата „Бор”, но и пожарникари од Територијалната противпожарна единица од Кавадарци, информира Ристовски и апелира до населението за внимание, за да се спречи, како што нагласи, евентуална нова појава на пожари со оглед на тополото време.