Претседателот на Либерално-демократската партија, Горан Милевски, заедно со членството на ЛДП, сочувствува со Францускиот народ во овие тешки времиња за целиот цивилизиран свет.
“Синоќа, заедно го славевме Денот на Бастилја, на Француската Република, за денес заедно да тагуваме за трагичната загуба на невини животи во синоќешниот терористички напад во Ница. Во мое име и во име на ЛДП, прифатете ги нашите искрени сочувства за народот на Франција.
Силно го осудуваме секој чин на тероризам против слободните жители на Франција, кои кукавички беа нападнати додека ги славеа слободата и еднаквоста, двете основни вредности на либералните демократии низ целиот свет.
Кога некој врши насилство и тероризам врз слободните и мирољубиви граѓани на Франција, истата акција е насочена и кон целото слободно општество и нема никаква поврзаност со цивилизираниот свет.
Цврсто верувам дека од најголемо значење за сите нас е да се обединиме и да преземеме одлучни акции со цел да ги запреме терористичките напади, кои се закана за целиот човечки род, без разлика на раса, религија или етникум.
Јас сум уверен дека Франција ќе има сила и можност одговорните за овој грозен чин да ги изведе пред лицето на правдата.
Стоиме обединети, со Вас и со Вашите семејства и веруваме дека Франција ќе ја надмине оваа ужасна трагедија и од истата ќе излезе посилна и поодлучна од било кога!