Суд во австрискиот град Линц денеска на 10 години затвор осуди еден државјанин на Австрија со босанско потекло, по обвиненија за убиства извршени за време на Војната во Босна и Хрецеговина во 90-те години на минатиот век.
Како што јавија австриските медиуми, идентитетот на осудениот 48-годишен маж не е соопштен, поради законските правила за тајност во Австрија.
Австирецот со босанско потекло е осуден по 16 точки за убиство, три точки за обид за убиство и за опжарување.
Обвинетиот во текот на судскиот процес негираше каква и да е негова поврзаност со делата кои му беа припишувани.
Според австриските медиуми, обвинетиот се товари за учество во напад на 20-тина босански муслимани врз селото Сердари во 1992 година, при што биле убиени 20 локални Срби, меѓу кои и шест деца, и биле запалени шест куќи.