Уникатен парк, на кој и големите метрополи ќе и позавидат на Македонија, ќе се гради во скопската општина Аеродром. Паркот со кој Скопје ќе понуди нова туристичка атракција ќе биде на површина од над 15 хектари, објави порталот „Курир“.
Оваа рајска градина, според порталот, ќе биде меѓу петте најубави во светот и ќе има премногу содржини за посетителите од сите генерации. Во неа, како што ексклузивно дознава провладиниот портал, слободно ќе шетаат животни од најубавите видови како срни, елени, мајмуни, фазани и пауни.
На отворената владина седница, претседателот на македонската влада, Никола Груевски, ја најави изградбата на овој парк.
„Со реализацијата на оваа најава Скопје ќе им понуди на туристите уште побогата понуда, како дел од неговата масовна модернизација од изминативе години“, коментира „Курир“.
