Службата за општи и заеднички работи на Владата на Република Македонија го објави тендерот за реконструкција на фасадата и на осветлувањето на објектот на Владата.
Градежните работи ќе се вршат по зададен проект, кој е интергален дел од тендерската документација.
За да можат да учествуваат, компаниите треба да имаат доставено ревидирани и објавени завршни сметки според законите на Македонија за изминатите 3 години. Минимален критериум за одредување на економската и финансиска подобност е компаниите да имале минимален промет од 5 милиони евра годишно исто во изминатите 3 години.
Од заинтересираните компании се бара и потврда дека имаат извршено барем две зделки кои вклучуваат градежни работи во кои е употребена не помалку од 3 илјади метри квадратни челична арматура. Покрај останатите услови потребна е и банкарска гаранција во износ од 5 отсто од вредноста на градежните работи, како и банкарска гаранција во износ од 2 отсто во текот на гарантниот период.
Тендерот ќе се одвива по патна електронска аукција, а документите треба да се достават до 24 декември во 10 часот.