Три лица се повредени откако трактор „Урсус“ со приколка натоварена со дрва, без регистерски таблици, што го управувал Т.У. (40) од Беловиште гостиварско, излетал од патот и удрил во дрво.
Несреќата се случила вчера попладне околу 17 часот и 30 минути, на локалниот пат што ги поврзува гостиварските села Беловиште и Куново, на излезот од Беловиште.
Во кабината на тракторот, биле лицата М.У. (73) од Беловиште и Д.Д. (18) од Албанија, кои од излетувањето се здобиле со повреди. Со друго возило веднаш биле пренесени во гостиварската болница.
По укажаната лекарска помош, М.У. е пуштен дома, додека Д.Д. е префрлен на скопските клиники. Причина за незгодата, според полицијата, е неприлагодена брзина, а вкупната материјална штета се проценува на околу 100 илјади денари.
СВР Тетово, информира дека за дрвата кои биле натоварени и се превезувале со тракторот, возачот не поседувал никаква документација.