Рокот за доставување на понудите на тендерот за продажба на ОХИС е продолжен до 30 ноември. Одлуката е донесена на последната владина седница со цел да се овозможи подготовка на квалитетни понуди од страна на потенцијалните инвеститори.
Измената, како што информира денеска Министерството за економија, се однесува само на двата правни субјекта кои веќе имаат подигнато тендерска документација до 7 ноември кога беше крајниот рок за купување на документацијата.
За измената на рокот за доставување понуди ќе бидат известени двата правни субјекта од страна на претседателот на Комисијата за спроведување јавен повик за прибирање понуди за продажба на акциите на државата и на Фондот за ПИОМ во ОХИС.
Ова е деветти тендер за продажба на ОХИС што го објавува Владата. Објектот се нуди за 14 илјади евра со услов да бидат задржани сите вработени и да се исплатат сите заостанати плати и придонеси. Во компанијата во моментот се вработени 800 работници кои тврдат дека немаат земено 15 плати, осум од 2008 и седум од годинава.