Непознат сторител денеска од спортската обложувалница „Плеј – ин“ во Тетово украл над 100 илјади денари.
Портпаролот на СВР Тетово Марјан Јосифоски информираше дека кражбата се случила околу 9 часот кога разбојникот со црна маска на главата и пиштол им се заканил на вработените.
– Непознатиот сторител се упатил кон двете вработени Б.А (26) и Х.С (19) кои во тоа време ја чистеле внатрешноста на обложувалницата и од Б.А побарал да му ја даде чантата на шанкот. Исплашени за својот живот, тие му ја дале чантата во која имало 100 илјади денари, промет од претходниот ден и 8.000 денари, средства на Б.А, лична карта, возачка дозвола и други документи, изјави Јосифоски.
По грабежот разбојникот избегал во непознат правец, а вработените го пријавиле случајот во полиција. На местото на настанот е извршен увид и се преземаат мерки за откривање на сторителот.
