Црвениот крст на град Скопје во пресрет на празникот Велигден ја организираше манифестацијата „Волшебно велигденско дрво”, посветена на 43-те деца и младинци кои го посетуваат „Дневниот центар за лица со церебрална парализа-Капиштец”.
Лицата од Центарот на 4-ти април ги запишаа своите желби на наменски картички-велигденски јајца и заедно со волонтерите на Црвениот крст ги закачија на големото „Волшебното велигденско дрво”. Сите хумани граѓани кои го посетија велигденското катче во ТЦ Рамстор, како што соопштија од Црвениот крст, имаа можност да ги исполнат желбите на лицата од овој Центар.
Подароците ќе им бидат доделени денеска во просториите на ТЦ Рамстор, при што посетителите ќе може да ја проследат и театарската претстава „Распеана турлитава“.