„Матица македонска“ во својата едиција „Современа македонска проза“ ја објави книгата „Потполковникот“ која е прв роман на универзитетскиот професор Димитар Пандев, автор на голем број научни трудови од областа на македонистиката и литературната критика.
– „Потполковникот“ е повест составена од пролог и епилог на едно поранешно, но не така одамна минато време. Како засебна целина, оваа повест се вклопува во раскажувачката целина со триптихонот „Излегување од приказните“, „Приказни од поранешните“ и „Пропатување низ приказните“, но и отвора можност за многу други приказни, информира „Матица македонска“.
Во препораката на делото, поетот Славе Ѓорго Димоски констатира дека е можеби прв роман во македонската литература со тема од средношколскиот живот.
– „Потполковникот“ е топло раскажана приказна, која читателот го враќа во седумдесеттите години на минатиот век, во време на безгрижност, созревања и големи очекувања, а сето тоа видено, сфатено и прераскажано преку приказните на еден гимназијалец, истакнува Димоски за романот на Пандев.