Предавање „Самрак на човештвото/Самрак на вистината“, посветено на експресионизмот во книжевностите од германското јазично подрачје денеска на пладне ќе се одржи во Националната и универзитетска библиотека „Св. Климент Охридски“ – Скопје.
Ова е шестиот настан во рамки на серијата културни настани „Денови на светската книжевност“ во организација на НУБ „Св. Климент Охридски“ – Скопје, со поддршка на Министерството за култура.
Филип Клетников и Јовица Тасевски-Етернијан ќе се осврнат на експресионизмот, на поезијата на најзначајните претставници на експресионизмот и на делото „Записите на Малте Лауридс Бриге“ од Рајнер Марија Рилке.
Експресионизмот како книжевно-историска одредница обично го означува книжевното творештво што доминира во втората декада на минатиот век во германскиот јазичен простор, а чиј што ментален хоризонт своите историски корени ги има уште во радикалната промена на светот и светогледите во 19 век.
Сите љубители на пишаниот збор кои ќе присуствуваат на настанот ќе можат да ги разгледаат и да ги купат делата од книжевните великани од германското јазично подрачје преведени на македонски јазик, објавени во рамки на капиталните издавачки проекти „Ѕвезди на светската книжевност“ и „Превод на дела од автори кои добиле Нобелова награда за литература“.
Првиот културен настан од серијата „Денови на светската книжевност“ беше посветен на кинеската книжевност, а потоа следеа претставувањата на американската, унгарската, шпанската, јужноамериканската и шведската книжевност.
Во НУБ „Св. Климент Охридски“ – Скопје во текот на 2016 година, со поддршка на Министерството за култура, континуирано ќе се промовираат и презентираат публикации од тековната издавачка продукција и од капиталните проекти. Ќе се организираат и книжевни средби, трибини и други манифестации со цел афирмирање и поттикнување на читањето и привлекување читатели од различни генерации.