Во пресрет на Денот на ослободување на главниот град на Република Македонија, 13 Ноември, вечерва се одржа традиционалната „Ноќна атлетска трка низ улиците на Скопје“.
Се одржаа две официјални трки: Трката за средношколци во машка и женска конкуренција и Главната трка за мажи и жени, на 5 односно 2,5 километри.
Од средношколците најдобри беа Сали Ибраими од СУГС „Михајло Пупин“, Војдан Крстевски од СУГС „Марија Кири Склодовска“ и Стефан Стојановски од СУГС „Кочо Рацин“, додека во женска конкуренција првите три места ги зазедоа Сермине Љатифовска од државното средно училиште „Методија Митевски-Брицо“, Марија Магдалена Василевска од СУГС „Јосип Броз-Тито“ и Марија Кузевска од средното училиште „Димо Хаџи Димов“.
Прв, по истрчани 4 круга во машка конкуренција, во главната трка во должина од 5 километри, на целта стигна Милош Ранчиќ, на второто место беше Александар Кираџиев, а трет Кокан Ајановски.
Жените трчаа два круга во должина од 2.500 метри, а првите три места им припаднаа на Христина Ристеска, Росица Костова и на Ениса Тасевска.