Издавачката куќа “Темплум“ ја објави книгата „Актерска игра пред камера“ од Синоличка Меллес-Трпкова. Ова издание може да се најде во книжарниците Или-Или, Култура, Три и Табернакул.
„Актерска игра пред камера“ е драгоцена и ретка книга на меѓународно признатата актерка и професорка Синоличка Меллес-Трпкова. Ова е „водич за сите оние бележани со пален знак“, како што метафорично го именува Меллес-Трпкова својот труд, за сите оние талентирани и надарени млади луѓе, за сите актери и студенти.
Секоја страница на овој водич ни укажува дека авторката сето свое искуство, знаење, љубов и сета своја широчина и отвореност кон професијата со која се занимава и светот што нè опкружува, на секој возможен и невозможен начин се обидува несебично да им ги пренесе на своите студенти и на оние што сакаат да ѝ се посветат на оваа нефатлива уметност.
Ова е, без двоумење, книга на автор што чувствува, што мисли и кој е свесен за широката потреба од сестран ангажман на актерот во времето и во просторот во кој живее и создава.
Односно, ова е книга што јасно ни порачува дека за да се биде уметник, не само актер, туку уметник воопшто, потребно е да се има срце и разум. А, згора на тоа, потребно е да се биде и хуман човек“, пишува д-р Наум Пановски, рецензент на изданието.