Михаил Младеновски јавно му се спротивстави на лидерот Црвенковски и побара негова смена и реформи во партијата.
Вели дека од СДСМ не може да биде исклучен бидејќи тоа не е работно место, туку идеолошка припадност. Најавува дека ќе му се придружат поголем број од партиските членови на опозицијата.
Во Центар ќе ислегол со независна листа, а тоа го најавува и во десетина други општини, и нема да колаицира со ниту една друга партија.
За СДС М ова Младеновски го прави по нарачка.
„Очигледно, во подолг временски период Груевски и врхушката на ВМРО ДПМНЕ прават се на чело на СДСМ да дојде раководство по нивна мерка, како што тоа го направија и овој пат, и при тоа не им пречи да злоупотребуваат и пари и институции да ја постигнат оваа цел.Господине Груевски, во СДСМ ова нема да ви помине. Поединствени сме од било кога и цврсто решени да ве поразиме и вас и вашиот режим.Изгубените души со членска книшка на СДСМ, од кои некои ги уценувате со пари, а некои со кривични пријави и недозавршени судски процеси нема да ви помогнат. На таквите единствено можете да им заблагодарите што поради нивните карактери ви овозможија да дојдете и толку долго да останете на власт“, рече Андреј Петров.
СДСМ, рече, е подготвен за битка со вас и вашиот режим, а секој член на СДСМ му е јасно или си СДСМ, или не си СДСМ.
„Отворени сме за соработка со секој во битката против вашиот режим, но во исто време ви благодариме што не ослободувате од теретот на вакви купени или уценети поединци“, рече Петров.