Како власт направивте масакр на дрвјата кај паркот Бристол, на дрворедите на бул. Климент Охридски, во Карпош 3 и во Карпош 4, на УКИМ и на Водно, реплицираше Стефан Богоев, пратеник и претседател на СДММ, на обраќањето на Владо Мисајловски, министерот за транспорт и врски, при собраниската дискусија по повод Предлог законот за зеленило.
„Урбаната мафија ги зеде сите парцели на сметка на зеленило, станавме шампиони во светски рамки во загадување на воздухот.
Како резултат на борбата на студентите во чиишто двор ги сечевте дрвјата со полиција, во 3 часот по полноќ, како резултат на борбата на Паркобраните кои исто така со полиција ги избркавте и во 3 часот по полноќ ги исековте дрвјата, како резултат на протестите на моите драги сограѓани од Карпош 3 и Карпош 4 против урбаната мафија, како резултат на масовните протести на граѓаните на Тетово, Битола, Кавадарци, Велес, Скопје и сите градови во кои се протестираше против енормното загадување на воздухот, токму по заслуга на овие граѓани, власта под притисок го предлага овој закон за зеленило“, изјави Богоев.
Ние ќе излеземе во пресрет на граѓаните и ќе гласаме ЗА ова решение, рече тој, „но лицемерието на власта е повеќе од очигледно и е веќе прочитано”.