Битолската подружница на ЈП „Македонија пат“ врши интензивно чистење на свлечиштето што утрово се појави на регионалниот патен правец Прилеп-Битола-Ресен, односно на делницата А-3 (73+300).
Според раководителот на оваа подружница Веселинчо Спасевски, неопходно потребно е да се направи проект за трајно решение на овој проблем кој го загрозува сообраќајот на овој регионален патен правец.
– Ние знаевме дека и годинава како и лани, при обилен дожд ќе ни се повтори оваа слика и затоа патот Прилеп-Битола-Ресен на овој дел е затворен, а во наредните неколку денови ќе се пренасочува низ градот Битола. Очекуваме до понеделник да заврши расчистувањето на свлечиштето од земјен и камен материјал, рече Спасевски.
Одлуката за овој прекин и пренасочување, како што посочи тој, утрово во 5 часот ја донесе стручен тим од повеќе институции, а со единствена цел да биде голема безбедноста во овој дел на сообраќајот.
– Свлечиштето ќе се смири со престанокот на дождот. Инаку, ние досега сме расчистиле неколку илјади метри кубни земјен и камен материјал, а очекуваме заради големината на масивот да се направи проект за трајно решавање на свлечиштето на овој дел од регионалниот пат, истакна Спасевски, раководител на ЈП „Македонија пат“ – подружница Битола.