Културно-информативниот центар на Република Македонија во Софија вечер организира промоција на стихозбирката „Ѕвезден корен” од академик Анте Поповски (1931-2003) на бугарски јазик, со која ќе почне чествувањето 85 години од неговото раѓање.
– Ова е прво самостојно дело на нашиот голем поет, преведено и издадено во Бугарија. Изборот на песните и преводот се дело на бугарскиот поет и преведувач Роман Кисјов, а стихозбирката е во издание на бугарското книгоиздателство „Ерго”, информира КИЦ на РМ во Софија.
За опусот на Поповски и за стихозбирката „Ѕвезден корен” пред публиката во Софија ќе зборуваат: Васко Шутаров, директор на КИЦ на РМ во Софија, преведувачот Роман Кисјов, сопственикот на издавачката куќа „Ерго” и редактор Мартин Христов. На промоцијата ќе бидат интерпретирани стихови од поетот, а најавено е и присуство и обраќање на членови од неговото семејство.
Објавувањето на преводот на поетската книга финансиски го поддржа македонското Министерство за култура.