Книжевна дружба со Дарко Лешоски и Ана Јовковска, на која ќе бидат промовирани нивните книги “Дете од лоша фамилија“ и „Пулсот на времето“, ќе се одржи во Прилеп, овој петок, 25 декември во 20,30 часот, во клубот „The Gallery House Pub“. Нивниот перформанс ќе го облагороди групата „Чалгија саунд систем“.
– Душата е дете. Сите души се деца. Како мали деца се радуваме со Дарко Лешоски на нашата заедничка книжевна дружба. А јас и Дарко сме толку различни, како црното и белото во еурокремот. Тој е релаксиран поет, декаден вљубеник во уметноста, вулгарен, но искрен до срж, а јас сум „контрол-фрик“, ситничарам врз нијансите на секој интерпукциски знак, барам виножито во ставовите и со лупа ги барам скриените значења зад секој збор. Дарко и забива нокти на ноќта, а јас енергијата ја црпам од првиот сончев зрак на денот. Тој поминува на црвено, а јас чекам на зелено. Но имаме барем нешто заедничко – вљубени сме во пишувањето и во животот…и непоправливо веруваме во победата над злото! И двајцата сме емотивни вампири и се храниме од чувствата на луѓето на кои им значи она што го работиме, толку различно, а сепак споено во еден заеднички предновогодишен, културен настан во Прилеп, вели Јовковска.
– Пред луѓе читам ретко. Ова ми е втор или трет пат годинава. Мекнеам ко млада невеста. Ќе има и музика додека читаме и зборуваме јас и Ана. Нема да има две монтирани вински чаши како во студио на МТВ од 1993-та, нема да има ништо сечено, лепено или монтирано. Дури се расправаме кој бил почитан или најчитан македонски автор, а сите знаеме дека не е ни еден писател, ами е премиерот и соопштенијата на партиските штабови, дури во некое студио се снима новогодишна емисија и се глуми лудило, јас и Ана ќе ви се отвориме да не прашате што сакате и на која тема сакате, па макар навлегле и пет пати повеќе од дозволеното ПМ10 честички во нашите гради. Ана е ден. Јас сум ноќ. Но, една работа секогаш ќе се сложиме: Сите ќе умреме! Да, ама поезијата и убавиот збор прави полесно да го прифатиме тоа. Јас полесно да го пребродам денот, Ана полесно да ја преброди ноќта, вели Лешоски.