Маратонскиот пливач Евгениј Поп Ацев е прогласен за најдобар спортист на Македонија за 2015 година. Оваа година тој победи на ФИНА гран при серијата и стана првиот Македонец кој победил на Охридскиот пливачки маратон.
– Голема чест и задоволство за мене е да се добие ова признание. Секако чест е да ја претставувам Македонија на меѓународните натпревари и на Охридскиот маратон. Благодарност до Агенцијата за млади и спорт за поддршката во изминатава година, која е моја најуспешна. Наградата ќе биде само мотив да продолжам да работам, изјави Поп Ацев по добивањето на наградата.
За најдобра спортистка е прогласена Стефани Тодорова, кик бокс.
Во конкуренција на репрезентации за најдобра е прогласена ракометната репрезентација на Македонија, додека женскиот карате – ката тим го доби признанието кај жените.
Наградата за селектор на годината ја доби Жарко Ристоски селекторот на одбојкарската репрезентација на Македонија.
Во конкуренција на млад спортист наградата му припадна на ракометарот Филип Талески, а каратистката Вероника Костовска е најдобрата млада спортистка.
Признанието најдобар спортист со инвалидитет го доби пливачот Андреј Стојановски.
За најуспешна федерација во 2015 година е прогласена Ракометната федерација на Македонија.
Наградата за најдобар македонски спортист во 2015 година во странство му нприпадна на капитенот на ракометната репрезентација Кирил Лазаров.
Свеченоста се одржа во Македонскиот народен театар, а најдобрите добија позлатена статуетка – силуета на спортист во движење.