Дваесет и тригодишниот Фитим И. од струшкото село Долна Белица е убиен во пукањето што се случи во неделата вечерта околу 22.30 часот на патот Струга-Долна Белица.
Осумнаесетгодишно момче од истото село е тешко повредено и од специјалната болница „Свети Еразмо“ во Охрид е пренесено во Ургентниот центар во Скопје, а четириесет и петгодишен жител на струшкото село Велешта е опериран во Општата болница во Струга и е задржан на лекување.
Струшката полиција интензивно трага по лицата кои пукаа. Според истрагата на струшкото Јавно обвинителство неколку лица од возило пукале кон група лица меѓу кои биле убиените и повредените. Причина за пукањето биле меѓусебни нерасчистени односи.
На местото на настанот извршен е криминалистичко-технички увид предводен од Јавен обвинител при Основното јавно обвинителство Струга во содејство со полициски екипи.
Притоа, пронајдени се и подигнати чаури од пиштолска муниција и чаури од автоматска пушка како и други предмети кои ќе се вештачат во Министерството за внатрешни работи во Скопје.
Секторот за внатрешни работи Охрид и полициската станица од Струга презема и други дополнителни мерки за утврдување на сторителот на кривичните дела.