Промоција на новата книга „Narro ergo sum / Раскажувам значи постојам“ на Владимир Мартиновски, во издание на Антолог, како и изложба на негови фотографии насловена „Во движење“ ќе се одржи на 25 ноември во „Концепт 37“ со почеток во 20 часот. Промотор на книгата ќе биде Владимир Јанковски, на изложбата – Влатко Галевски.
„Мартиновски во манир на искусен компаратист во книгата Narro ergo sum / Раскажувам значи постојам докажува дека не само што современата литература мора да се храни од дијалогот со книжевната историја туку и современата теорија на литературата е невозможна ако во својата основа не е отворена, хибридна, комбинаторичка. Мартиновски во еден лежерен „борхeсовски манир“, со секогаш присутни, но не премногу наметливи референции, во оваа книга, всушност, ја раскажува приказната за она што Гете го нарекуваше „светска книжевност“ – концепт според кој една литература може да биде жива и актуелна само преку спојот и во креативниот дијалог со другата литература, како дел од големиот културен мозаик“, се вели во рецензијата на книгата.
„Во движење“ е првата самостојна изложба на панорамски фотографии од Мартиновски, направени во повеќе градови во светот.
Мартиновски e поет, раскажувач, есеист, теоретичар, преведувач, фотограф. Работи како вонреден професор по предметот компаративни поетики на Катедрата за општа и компаративна книжевност при Филолошкиот факултет „Блаже Конески“. Автор е на повеќе поетски збирки, книги со есеи и книжевно-теориски студии, а приредил и неколку антологии, како и неколку зборници научни трудови од областа на книжевноста.