Комисијата за финансирање и буџет денеска ја продоолжи расправата по предложениот буџет за 2016 година, која започна завчера. Пратениците од мнозинството посочија на позициите од предложениот буџет за инвестиции, за здравството, образованието, а опозицијата побара одговор како ќе се трошат парите.
За Лилјана Кузмановска од ВМРО-ДПМНЕ со буџетот се покриваат многу битни компоненти. Посочи на парите обезбедени за здравството, за градење болници, патишта, градинки, образование, за поддршката на социјалните категории и слично.
– Носиме конзистентна политика која се грижи за инфраструктурата, намалување на буџетски дефицит, издвојување парични средства за социјалата и навремена исплата на пензии, субвенции во земјоделството, што значи социјална сигурност и спокојство на граѓаните, рече Кузмановска.
За Горан Сугаревски од СДСМ не станува збор за никаква конзистентност во ниту една политика на Владата и побара бројки за тоа колку чини државната поддршка на странските инвеститори и роуд шоуата. Тој додаде дека би гласал за буџет кој ќе нема непродуктивни трошоци.
Кузмановска одговори дека 90 милиони евра се инвестирани од Кромберт и Шуберт, дека се одвоени 210 милиони денари за болниците во Битола, Прилеп и Куманово и побара од Сугаревски СДСМ да излезе со програма и писмено да им прикаже на граѓаните што ќе направи.
Горан Мисовски забележа дека се промашени прогнозите за растот во последните пет години, како и за поддршката на странските инвестиции и средствата што се даваат за промоција.
Вицепремиерот и министер за финансии Зоран Ставрески потенцира дека се труди да обезбеди макроекономска стабилност и да предложи буџети кои на различни начини ќе успеат да се справат со предизвиците што ги носи времето.
– На почетокот на мандатот на оваа Влада беа едни предизвици, кога имаше вишок пари, а од друга страна од 2009 година наваму предизвиците се многу поголеми и потешки. Многу посилни земји како Италија, Шпанија, Португалија или Ирска не успеаја да најдат соодветен одговор на тие предизвици, рече Ставрески.
Оцени дека Владата исклучитено добро се справи со предизвиците и додаде дека најзначајно е што не се затворија македонските фабрики, туку напротив капиталните инвестиции создадоа работа за многу македонски фирми.
Потсети и на други политики кои помогнаа да отворат работни места, на задржување на стапките на даноците, на добрите услови за компаниите изразени преку ниските трошоци, потоа намалување на царините, административните бариери и слично.