Либерално – демократската партија (ЛДП) преку своите советници во општините Кисела Вода и Аеродром покрена иницијатива за подобрување на безбедноста на сообраќајот на патиштата во општините.
Причина за иницијативата, соопшти денеска ЛДП, е драстично зголемениот број на сообраќајни незгоди со жртви и повредени во урбаните средини.
– ЛДП смета дека се потребни итни мерки и активности на градоначалниците, општинската администрација и советите, во насока на унапредување на безбедноста во сообраќајот, пред се’, поради фактот што голем дел од ингеренциите и надлежностите во областа потпаѓа токму под единиците на локалната самоуправа, се вели во соопштението од ЛДП.
Собранието на Република Македонија, потсетува ЛДП, уште пред една година усвои Национална стратегија за унапредување на безбедноста во сообраќајот на патиштата 2015-2020 година. За разлика од пратениците, потенцира ЛДП, единиците на локалната самоуправа немаат усвоено никаков акт, иако имаа должност да изготват и усвојат акциски планови, односно програми за операционализација на стратегијата, кои ќе содржат конкретни мерки и активности за унапредување на безбедноста во сообраќајот.