„Неуставен, антидемократски, нецивилизиран, срамен, скандалозен, само вака може да се оцени потегот на ВМРО-ДПМНЕ и ДУИ за најавениот предлог-закон за забрана на објавувањето на прислушуваните материјали.
Преку овој обид со драконски казни и цензура да се спречи ширењето на „Вистината за Македонија“, јасно се препознава стравот и нервозата кај ВМРО-ДПМНЕ и ДУИ од губењето на власта. Истовремено, преку експресното повлекување на предлогот, владеачките партии признаваат дека материјалите од прислушуваните разговори се целосно вистинити и автентични, а не како што досега тврдеа сечени, лепени и монтирани“, велат од ЛДП.
„Потсетуваме дека овој предлог е во спротивност со членот 16 од Уставот на Република Македонија, а посебно ставот 7 од овој член, кој гласи „Цензурата е забранета”.
„Со ваквата пушти-повлечи политика, ВМРО-ДПМНЕ и ДУИ јасно покажаа дека се исплашени од судот на граѓаните за сторените тешки криминални дела и изборни фалсификати и типично за класичен диктаторски режим, после 9 години владеење се обидоа да воведат цензура, и тоа на кукавички начин“, потенцираше Јаневиќ.
„Со овој предлог, рече тој, кој не им помина, ВМРО-ДПМНЕ и ДУИ покажаа дека сакаат да ја избришат колективната меморија кај граѓаните, свесни дека истите тие ќе им пресудат на изборите во април следната година. Потсетуваме дека договорот од Пржино е постигнат врз основа на истите разговори кои тие сега сакаат да ги цензурираат.
Либерално-демократската партија им порачува и на ВМРО-ДПМНЕ и на ДУИ дека не постои таков закон и таков диктаторски акт кој ќе спречи јавно да се зборува за криминалното владеење, корупциските афери и изборните фалсификати на нивните фунционери.
Договорот од Пржино предвидува дека нема да има објавување на нови материјали бидејќи истите треба да се предадат на специјалниот обвинител, а не цензурирање на веќе објавените разговори“, вели Јаневиќ.
„ЛДП јасно и недвосмислено ќе гласа против секој закон кој би бил на штета на граѓаните, и ќе се спротистави на секој обид за воведување цензура во македонското општество“, порача Јаневиќ.