Сојузот на синдикатите на Македонија (ССМ) преку соопштение реагира на денешната изјава на претседателот на Комисијата за труд и социјална политика на СДСМ Мила Царовска.
– ССМ е крајно непријатно изненаден од последниот обид за упад во слободата на синдикалното организирање направен од страна на СДСМ и Мила Царовска, кое е спротивно на Уставот на Република Македонија и на Конвенциите на МОТ за слобода на синдикално организирање, се вели во соопштението.
ССМ, како што се наведува, е демократска организација која самостојно и транспарентно ги уредува внатрешните односи и нема да дозволи ниедна политичка партија да си зема за право да уредува кој синдикат е негов и ќе го земе под закрила, а другите ќе ги етикетира.
Според ССМ, Мултиетничкиот синдикат за образование на Република Македонија (МЕСО) делува спротивно на Статутот на ССМ и не се прокламира како грански синдикат.
– ССМ направи историски чекор со донесувањето на Законот за минимална плата и обезбеди да се спасат 65.000 работници, кои живееја во беда со примања од 4.500 денари. За разлика од просечната плата, која во 2005 година изнесуваше 12.566 денари, денес просечната плата е за над 100 отсто зголемена и изнесува 22.050 денари, стои во соопштението од ССМ.
ССМ заедно со Владата, работодавачите и синдикатите во Македонија, како што се наведува, е една од најретките држави која ги задржа работните места на работниците, ги зголеми платите, пензиите, не дозволи зголемување на пензискиот стаж спротивно на волјата на работниците, обезбеди простор за масовни вработувања…