Македонија ги има исполнето условите за да стане членка на НАТО уште во 2008 година. Стратешка политика на оваа Влада е земјата да влезе во НАТО и ЕУ, нагласи премиерот Никола Груевски на вчерашната трибина во Велес.
„Сите реформи за година и пол ние ги завршивме откако дојдовме на власт, односно сите оние што претходната Влада не можеше да ги заврши. Така добивме статус на земја што ги исполнува сите услови, а поканата е одложена поради прашањето со јужниот сосед.
– Исто така, во 2009 година успеавме да ги елиминираме визите, нашите граѓани сега патуваат без визи низ Европа и првпат добивме позитивен извештај за реформите и препорака за почеток на преговорите.
– Таа препорака веќе четири пати се обновува, а оваа година добивме најпозитивен извештај од Европската Комисија и четврта по ред многу сериозна препорака од ЕК до Европскиот Совет велејќи дека овојпат Комисијата бара без одлагање на Македонија да и се додели датум за почеток на преговорите и да ги започне затоа што земјата заслужи, затоа што земјата и Владата правеа реформи со кои имаат сериозен напредок на сите полиња на општественото живеење“, истакна Груевски.