По повод Европската недела на движење, денеска во Скопје ќе се одржи велосипедско дефиле под мотото „Во град без мојот автомобил“. Стартот е во 11 часот пред плоштадот „Пела“, а целта кај Школката во Градскиот парк.

Следете a1on на Instagram

Организатори на дефилето се Град Скопје, Министерството за животна средина и просторно планирање и Делегацијата на Европската унија во Македонија. Во велосипедското дефиле ќе се приклучи и скопскиот градоначалник Коце Трајановски.

Велосипедистите од плоштадот „Пела“ ќе поминат низ „Порта Македонија“, ќе се движат по улицата „11 Октомври“ и низ булеварите „Кочо Рацин“, „Кузман Јосифовски-Питу“ и „Јане Сандански“. На крстосницата со булеварот „Србија“ се прави полукружно вртење и велосипедистите ќе се вратат по булеварите „Јане Сандански“, „Кузман Јосифовски-Питу“ „Крсте Мисирков“, „Гоце Делчев“, „Илинден“. Влезот  во Градски парк е меѓу паркингот на Зоолошката градина и бараките на Град Скопје, до Школка во Градски парк.

На пладне кај Школката ќе се одржи манифестација на која ќе се обрати градоначалникот Трајановски, а за учесниците во велосипедското дефиле ќе има награди. Првпат во Македонија ќе се организира Саем на велосипеди од познатите светски брендови.

Следете a1on на Youtube

Град Скопје ги известува граѓаните дека во текот на движењето на велосипедистите, на овие улици и булевари ќе има краткотраен прекин на сообраќајот.

Градските власти ги повикуваат сите граѓани и институции да ги остават паркирани своите возила и да се одлучат за велосипеди, да пешачат или да користат јавен превоз.