„Народно движење за Македонија како и македонскиот народ се силно вознемирени од информациите во јавноста дека специјалниот јавен обвинител ќе го бираат странците Аиво Орав и Џес Бејли доколку ВМРО-ДПМНЕ и СДСМ не успеат во тоа.
Во услови кога земјата е доволно понижена и посрамена на меѓународната сцена поради немоќта на македонските политички лидери самите да понудат излез од кризата, доколку и изборот на специјалниот обвинител го извршат странците, тогаш дефинитивно ќе биде запечатена идејата за самостојниот и суверениот карактер на државата.
Да потсетиме, НДМ за цело време на кризата во која е заглавена земјата ја реафирмира својата заложба за решение на домашен терен со домашна памет и без странско туторство.
Меѓутоа, во услови кога странците наметнаа договорно решение за кризата, бараме од Никола Груевски и Зоран Заев одговорно лидерство барем во однос на реализација на договореното вклучувајќи го и изборот на специјалниот обвинител, во насока самите тоа да го направиме со одлуки на домашните политички актери со што барем делумно ќе го анулираме горчливиот факт дека земјата и понатаму, недозволиво во очите на демократските држави се претставува како незрела демократија, која не може да обезбеди излезни решенија без меѓународно туторство“, се вели во соопштението на НДМ.