Поетите Суџата Бхат од Индија, Сигал Бен Јаир од Израел, Линда Марија Барош од Франција, Метин Челал од Турција и Јусеф Комунјака од САД ќе гостуваат во Битола, информира Центарот за култура-Битола.
– Манифестацијата „Поезија на пат“ ја реализираме во соработка со меѓународниот фестивал „Струшки вечери на поезијата“, институција која ни овозможи во Битола да гостуваат големи и светки познати поетски имиња, добитници на значајни интернационални награди, рече Борче Димтровски, директор на Центарот за култура-Битола.
Тој информира дека Комунјака е еден од петте најголеми поети во САД и добитник на Пулицерова награда.
– Поетесата од Индија Суџата Бхат насекаде во светот привлекува со својата поезија, а Линда Марија Барош од Франција со романско потекло за своето поетско творештво неодамна ја доби големата награда „Аполинер“. Пред битолската публика ќе се претстави и Метин Челал кој во моментов е претседател на турската асоцијација на издавачи, а без сомнение со својот настап интерес ќе предизвика и поезијата младата поетеса Сигал Бен Јаир од Израел, истакна Димитровски.
За поетите од Индија, Израел, Франција, Турција и САД организирана е целодневна програма која ќе се реализира овој четврток. Поетите ќе имаат средби со деца од населеното место Бистрица, посета на Амриканското катче, Музејот во Битола, а во вечерните часови ќе настапат на летната сцена на Тумбе Кафе.