Понатамошна демократизација е можна само со воспоставување на Македонија како една изборна единица по пропорционален модел, воведување на системот на отворени листи и укинување на прагот од собрани 1.000 потписи во секоја изборна единица и прифаќање независни листи со собрани 1.000 потписи вкупно од сите изборни единици. Ова се заклучоците што ги усвоиле учесниците на денешната трибина „Дали понатамошната демократизација на Македонија е можна без промена на изборниот модел?!“ што се одржа во хотел „Карпош“ во Скопје.
Трибината ја организираа Алијанса за позитивна Македонија, Демократска обнова на Македонија, Демократски сојуз и Партија за демократски просперитет – ПДП, а на неа учествува и претставници од левичарско движење Солидарност, Ленка и поранешни амбасадори.
Учесниците на трибината, се наведува во соопштението, се со став дека на овој начин ќе се овозможи поголемо политичко разногласие, со многу повеќе конструктивни политички идеи, а воедно ќе значи и намалување на ризикот од воспоставување на автократски тенденции.